Þegar "heilbrigt" mataræði gerir illt verra

Getur nikkel í mat verið að valda þér vanlíðan og neikvæðum einkennum sem enginn skýring finnst á?

Undanfarin ár hef ég sérhæft mig í að vinna með einstaklingum sem grunar að þeir glími við nikkelóþol – ástand sem getur haft djúpstæð og neikvæð áhrif á líðan. Nikkelóþol er oft vanmetið vandamál en með markvissri vinnu þar sem mataræðið er tekið til endurskoðunar, sem og fræðsla aukin um áhrif nikkels í fæðu, hef ég séð marga ná ótrúlegum bata og betri líðan. Hjá þeim einstaklingum sem þola illa nikkel í mat, getur það breytt öllu að draga úr magni nikkels. Meltingin verður hraðari og léttari, mígrenisköstum fækkar, efnaskiptin verða betri, húðútbrotum fækkar og líðan almennt batnar á allan hátt.

Óþol sem fer huldu höfði

Nikkelóþol er ekki það fyrsta sem flestir hugsa um þegar líkaminn sendir frá sér óljós einkenni. Samt bendir margt til þess að það sé algengara en áður var talið – jafnvel miklu algengara. Nikkel finnst í flestum þeim matvælum sem við jafnan tengjum við hollustu og heilbrigði, og því getur verið erfitt að átta sig á orsökinni.

Einkenni nikkelóþols eru mismunandi, en meðal þeirra algengustu eru:

• Húðútbrot og kláði

• Magaverkir, ógleði og uppþemba

• Þreyta og höfuðverkur

• Óregluleg hægðalosun eða niðurgangur

Þessi einkenni geta komið fram nokkrum klukkustundum eftir máltíð og því oft erfitt að tengja þau matnum með beinum hætti.

Óþol eða ofnæmi – hver er munurinn?

Ofnæmi er brátt og sterkt ónæmissvar líkamans, og getur verið lífshættulegt. Óþol er hins vegar ekki bein ónæmissvörun, heldur oft tengt meltingar- eða efnaskiptakerfinu og lýsir sér með þrálátum, oft á tíðum lúmskum einkennum. Það getur því tekið tíma að greina tengslin – ég tala nú ekki um þegar við erum að borða mat sem við höldum að sé hollur.

Hvað er nikkel og hvar finnst það? 

Nikkel er málmur sem finnst í náttúrunni og er notaður í ýmsar vörur – allt frá skartgripum yfir í eldunaráhöld. En það er líka að finna í matvælum eins og súkkulaði, hnetum, baunum, höfrum, ákveðnum ávöxtum (hindber, ananas, rúsínur, þurkkaðir ávextir, avakadó), grænmeti og sumu sjávarfangi. Allt er þetta fæða sem getur innihaldið hátt hlutfall nikkels.

Leiðin til bata 

Ef þig grunar að nikkelóþol geti verið undirliggjandi þáttur í þinni vanlíðan, er fyrsta skrefið að fá greiningu og vinna svo áfram með fagaðila. Með réttri næringarstjórnun – sem útilokar nikkelríkar fæðutegundir á meðan líkaminn jafnar sig – þá má draga verulega úr einkennum og bæta lífsgæði. 

Hlustaðu á líkamann þinn og ef hann er að kvarta reyndu að finna lausn.

Ráðgjöf hjá sérfræðingi getur hjálpað til við að tryggja að mataræði þitt verði áfram fjölbreytt og næringarríkt.

Nikkelóþol er raunverulegt ástand sem krefst vitundar, fræðslu og samræmdra lausna.